ENGLEBORN (20.04.12 )
Robert Muchamores ungdomsserie «Cherub» har kome ut i vel 12 bøker i heimlandet Storbritannia, ein 3-4 bøker her i Noreg og første boka er no komen i teikneserieform frå Samlaget.
Ja, den er på Nynorsk.
«Cherub» er ein serie i den populære «Barneagent» sjangeren, og denne gongen er det ein 12-årig nyleg foreldrelaus gut ved namn James med ei eiga evne til å hamne i trøbbel som vert rekruttert av den Britiske Sikkerheitstenesta.
Fokuset i byrjinga er på å verte kjende med James, i ei dramatisk, kjensleladd og gatenær historie. Dette berer oss på ein effektiv måte gjennom den eksposisjonstunge midtdelen der vi får vite om Cherubprosjektet og inn i James sitt første oppdrag: Å infiltrere mistenkte øko-terroristar for å stoppe eit angrep på eit toppmøte om energipolitikk. Men Muchamore har ikkje gjort det enkelt, her vert omstenda som James vert sluppen ned i problematisert og sett frå fleire sider, der er ikkje enkle svar.
Dette er ei god første-bok, med eit interessant konsept og der vert på ein fin måte introdusert eit stort og variert persongalleri som både tener ein funksjon her og truleg i seinare bøker.
Der slike adapsjonar har lett for å verte tørre og forklarande, har Edgington klart å gi boka ein god overgang til seriemediet. Edgington er elles ein god «handverkar» innan serieskriving som har jobba på alt frå Batman til Terminator og Judge Dredd, forutan ein del meir personlege eventyrseriar. Det ser ein att her, adapsjonen har fått ein verkeleg driv utan å ofre karakterskildringar eller «kjøtet» i historia.
Teiknaren, John Aggs, har ein flott Manga-inspirert stil som passar utmerka til historia. Eller ein burde kanskje seie Anime-inspirert idet den har klar-linje konturar og «Cel-shaded» fargeleggjingsteknikk og elles ein stil som minnar om vaksnare anime serier.
I sum: ei drivande god ungdomsbok, underhaldande og tilgjengeleg utan å vere forenklande, og den kan og anbefalast på det varmaste til vaksne lesarar.
Cherub Bok 1: Rekrutten
Adaptert av Ian Edgington, teikna av John Aggs etter ein roman av Robert Muchamore
Omsett av Øystein Rosse
ISBN 9788252180237
176 sider
279 kroner
Samlaget
ROCKA SERIEMORD <- Eldre | Nyere -> SUPERLAPSKAUS