USMAKELEG JUL - NAM NAM ( 4.12.12 )
Pyton og Wumos julehefter, for dei som synast vanlege julehefter er fløff!
Usmakeleg, avskyeleg, skatologisk, coprofilt, korrumperande og ei hån mot menneskeverdet. Men jøss så morosamt.
Pyton.
Pyton var ei blekke utan respekt for noko, full av pubertal humor. Men sidan det var der eg var når desse hefta først kom på marknaden, så passa det meg midt i blinken. Kanskje det er difor at eg synast det held seg forbanna godt, at nostalgiens GHB lammar dømmekrafta mi?
Frode Øverli gir oss Jugenissen, Arild Midthun gir oss diverse julesatiriske illustrasjoner og Bjørn Ousland gir oss julehefte-juleparodier med Helliteren og Halvlitern. Alt under Dag Kolstads kyndige og rytmiske piskeslag.
Medan Kris Walters nok ein gong gir oss definisjonen av å ta ein grov vits ti gonger for langt.
Dette er ungdomssynder av den typen som kan få Aylar til å halde hovudet høgt og seie, «javel, men eg teikna aldri for Pyton».
Kjøp heftet og gi det til husets tenåring før Ibsen og Kielland får kloa i han.
Jula 2012 er Pyton
Av Dag Kolstad, Frode Øverli, Arild Midthun, Bjørn Ousland, Kris Walter, Alf Woxnerud etc.
36 sider
Kr 49,90
Egmont Serieforlaget
Wumo
Mykje er sagt om Wumo og deira evne til å tråkke folk på tærne. Nakne tær. Med liktorner og podagra. Iført vernesko med isbrodder.
Mellom anna er her i heftet den no berykta stripa med au-pairen i oppvaskmaskina. Uff så rasistisk.
Med uttrykksfull strek og fast grep om timingen er Wumo ein av dei mest teknisk brilliante stripene på den skandinaviske seriemarknaden. Og alt som er heilag i vårt halvveges sekulære samfunn vert rive ned, tråkka på og smurt inn med avføring med den naive entusiasmen til ein innavla hoffnarr frå ei lang rekke av hoffnarrar.
Wumo er ein teikneserie for folk som frekventerar apeburet i dyrehagen med eit skjult håp om at i dag er dagen at Apane kastar avføring på dei.
Og viss du i det heile tatt vert krenka av det eg har skrive ovanfor så veit du at dette ikkje er eit hefte for deg.
Elles: Løp og kjøp. Dette er gode greier.
Det bør kanskje nemnast at Wumo òg er å finne M nr 12, M Julehefte og Larsons julehefte, og at fleire av stripene i dette heftet òg er å finne i dei andre hefta. Slik at ein er klar over dette på førehand.
Wumo Crazy X-Mas 2012
Wulff og Morgenthaler
36 Sider
Kr 59,50
Cappelen Damm
DONALD PÅ SERIEMORD <- Eldre | Nyere -> GODT FORSØK, MEN ER DET GOD TEGNESERIE?