KATZENJAMMERJUL ( 7.12.12 )
Vi ser på begge versjonane av den klassiske rølpeserien.
Kapteinen
Eg har ikkje lagt skjul på at eg ikkje set pris på den glatte, daude linja Henrik Rehr har brukt til å restaurere sundags-stripene i Kapteinens Jul for reproduksjon. Eg kan forstå at det er naudsynt, mange seriar frå den perioden har blitt restaurert (ved at ein tusjar opp att sidene basert på reproduksjonar) og ingen forlag ville ha gått til dei utgiftene utan at dei meinte dei var nøydd.
Henrik Rehr er òg elles ein framragande teiknar, som ein kan sjå av hans flotte arbeid på Knerten Juleheftet i år.
Men teikningane her er ikkje det store problemet. For meg er gagsene i årets hefte ikkje så forseggjorte som eg føretrekker. Korkje tekst eller teikningar er på det nivået eg forventar. Eg veit ikkje kva år desse stripene opphavleg er frå, sidan den informasjonen ikkje har overlevd restaurasjonsprosessen, men innhaldet her er ganske middels.
Det lider kanskje spesielt ved at eg las det i tandem med Egmonts Knoll og Tott hefte.
Kapteinens Jul
Rudolph Dirks – restaurert av Henrik Rehr.
36 sider
Kr 49,50
Schibsted Forlag
Rampegutane
Knoll og Tott heftet til Harold Knerr, derimot, med striper frå 1936 til 1944, er Katzenjammer på sitt beste. Forseggjorte teikningar, fylt med bakgrunns-detaljar, komplekse gags og ein drivande fart. Ei utsøkt blanding av visuelle og verbale gags.
Nokre år er det litt konkurranse mellom desse to hefta frå to forskjellige forlag om kva som er best, i år er det rein utklassing.
For all del, viss ein er entusiast så kan ein kjøpe begge to, Kapteinens Jul er sånn middels, men det er ikkje dårleg. Men Knoll og Tott i år er eit gourmet-måltid, så viss ein berre kjøper eitt, kjøp det.
Knoll og Tott
Harold Knerr
36 sider
Kr 46,90
Egmont Serieforlaget
ENNO MEIR DISNEY-JUL <- Eldre | Nyere -> NYE TILDELINGER FRA KULTURRÅDET