Tidsskrift for norsk tegneserieliv

Om Serienett

Serienett gir deg siste nytt om norske tegneserie-utgivelser, anmeldelser og andre tegneserierelaterte nyheter. Nettsiden drives og redigeres av Trond Sätre.

Serienett er støttet av Norsk Kulturråd og Bergen kommune.
Norsk Kulturråd
Bergen kommune

Har du tips? Send e-post til trond@serienett.no. Sjekk også ut Serienett på Facebook. En del stoff publiseres kun der, og det er til stadighet gode og interessante menings-utvekslinger om tegneserier på Serienetts Facebook-gruppe.

Søk i Serienett

RSS / Atom

Annonser


Raptus Comics Festival Oslo Comics Expo Deichmanske Serietek

EIN TRAKISK TRAGEDIE (29.07.14 )

Vi ser på teikneserien som inspirerte storfilmen ”Hercules”.

Av Knut Robert Knutsen

Dei fleste har vel no høyrd om storfilmen med Dwayne «The Rock» Johnson i hovudrolla. Skjønt utifrå norsk pressedekning så kan ein verte tilgitt for å tru at det er Aksel Hennie som er stjerna i filmen.

Eg skal her snakke litt om teikneserien som filmen er basert på. Det fulle namnet på serien er Hercules: The Thracian Wars, som også var arbeidstittelen på filmen.

Ein kan på sett og vis seie at ideen bak serien er utforma per komité. Forlaget Radical hadde ein idé om ein Herakles som var meir menneskeleg, jordnær og røff, og hyrte så inn ein forfattar for å få dette ned på papiret.

Men den mannen dei hyrte inn, den britiske serieforfatteren Steve Moore, var ingen kven som helst. Han var ein respektert forfattar blant andre profesjonelle i Storbritannia, sjølv om han ikkje var av dei mest populære stjernene, og den kjende Alan Moore (ingen slektning) seier sjølv at han lærte å skrive teikneserier av Steve Moore.

Med ei livslang interesse for greske myter og eldre historie utforma Steve Moore ei forteljing som var sterkt rotfesta i levesettet på den tida, til og med dei mytologiske figurane som er brukt er tidsriktige, og sjølve historia er informativ, brutal og overraskande.

Sjølve konseptet er enkelt. Hercules (Herakles) og hans lille bande med krigarar er hyrt inn av Cotys, konge over det barbariske Trakia, for å hjelpe til med å slå ned eit valdeleg opprør. Denne historia går så fort fram på ein så kronglete sti at å seie meir vil gå inn på spoiler-territoriet.

Det som kan seiast er at karakterane kjem klart fram og er engasjerande, handlinga er brutal, men naudsynt og historia er truverdig. Steve Moore sitt grep på å formidle ei tankevekkjande forteljing med veldig mykje kjøt på beina, samt notidig relevanse, under ein saus av blod og gørr, er inspirerande. Dette er ein turbo-testosteron action-serie, men òg verdt å lese for historien under.

Spesielt karakteren Tydeus (Aksel Hennie sin rolle i filmen) er særs fengjande, med sin barbariske og einspora framferd. Ein skikkeleg scene-stjelar. Elles er kjende Herakles’ «kompisar» som Iolaus (Iolaos) og Autolycus (Autolykos), tjuvanes konge, med, samt krigerinna Atalanta og Meleander.

Bileta til Admira Wijaya, for dette er malt, ikkje gjort med tusj, er vakre og dynamiske. Fargane er stemningsskapande og formane skarpe. Det er ofte eit problem med malte serier at dei kan verte for statiske, stilleståande, eller at der er snarvegar i historieforteljinga på grunn av tidspress etc. Det er det ikkje spor av her. Bileta er så dynamiske og fengande som ein ville forvente av til dømes Simon Bisley, men med ein meir realistisk teiknestil.

Absolutt å anbefale, og det kan òg seiast at serien hadde ein oppfølgjar: «Hercules: The Knives of Kush» av Steve Moore, Chris Bolson og Doug Sirois.

Forfattaren, Steve Moore, døydde 16 mars i år, og for dei som har fulgt med i Dagbladet, så vart det referert til ein kontrovers der om filmen som har si rot i eit intervju med Alan Moore på Bleedingcool.com. Der er to lag med misinformasjon der som vi bør sjå litt på.

Ifølge Dagbladet så skal Alan Moore ha blitt forbanna fordi filmen vart sluppe så nært Steve Moores død og meint at filmen burde ha vore stoppa, og at Steve Moore ville ha ynskt at den skulle stoppast men at noko med kontrakten gjorde det umogeleg.

Ikkje berre er dette ikkje det Alan Moore seier i intervjuet, men det er ei bisarr tolking som ikkje tek inn over seg at dette var eit kommersielt skriveoppdrag for Steve Moore og han hadde aldri nokon autoritet til å stoppe filmen.

Det Alan Moore faktisk seier er at han vil at folk skal boikotte filmen fordi:
1) Forlaget lurte Steve Moore slik at han ikkje fekk dei pengane han vart lovd viss filmen vart filmatisert
2) Steve Moore ville ikkje ha namnet sitt identifisert med det endelege produktet og namnet hans burde fjernast og
3) Filmselskapet misbrukte dødsfallet til Steve Moore i marknadsføringa av filmen.

Denne saka var ei veke gamal innan Dagbladet plukka den opp, men allereie første dagen vart desse påstandane imøtegått og det viste seg at Alan Moore uttalte seg på sviktande grunnlag.

1) Det viste seg at Steve Moore hadde misforstått kontrakten. Han hadde bedt om, og fått, eit mindre beløp for filmrettane på førehand som ikkje var avhengig av at desse vart seld, i staden for den litt større summen viss han venta. Det vart framlagt på Bleedingcool ein kopi av hans e-mail der han beklaga misforståinga.

2) Steve Moore var riktignok misnøgd med at filmatiseringa hadde tatt seg visse fridomar, men namnet hans er på filmen fordi redaktøren hans sikra han kreditering i kontrakten. Dette er då bunde av fagforeiningsreglane til Writers Guild of America som seier at krediteringa kun kan fjernast viss forfattaren sjølv bed om det (noko Steve Moore hadde høve til men ikkje gjorde) eller viss arvingane eller bustyrar bed om det. Alan Moore innehar ikkje noko slik rolle.

3)Fleire har leitt etter det påståtte misbruket av Steve Moores namn til marknadsføring i nekrolog og artiklar, basert på det Alan Moore sa, men ingenting som liknar har blitt funne.

Det som gjenstår er at Alan Moores kritikk og oppfordring om boikott kjem på særs mangelfullt grunnlag.

Det einaste som kan seiast sikkert er at Steve Moore var misnøgd med endringar i materialet som han meinte gikk ut over integriteten til historia.

Hercules: The Thracian Wars
Steve Moore (tekst) og Admira Wijaya (bilete)
144 sider (òg tilgjengeleg på Kindle)
USD 14.99
Radical Publishing
ISBN-10: 0980233518
ISBN-13: 978-0980233513

divider
  Textile Hjelp

<- Eldre | Nyere ->

Siste kommentarer
Trond Sätre (ROCKY NETTOPP NÅ – 100!!)
håkon strand (ROCKY NETTOPP NÅ – 100!!)
Jostein Hansen (TEGNESERIER SOM SAKPROSA)
IpComics (FANTOMET NETTOPP NÅ - DEN TOMME TRONEN)
Bjoulv (FANTOMET NETTOPP NÅ - DEN TOMME TRONEN)
Thomas Askjellerud (FANTOMET NETTOPP NÅ - DEN TOMME TRONEN)
Jostein Hansen (FANTOMET NETTOPP NÅ - DEN TOMME TRONEN)
arild (FANTOMET NETTOPP NÅ - DEN TOMME TRONEN)
Paul Andreas Jonassen (FANTOMET NETTOPP NÅ - DEN TOMME TRONEN)
arild (FANTOMET NETTOPP NÅ - DEN TOMME TRONEN)