EIN SYMPATISK MORALIST (15.10.15 )
Vantina Andreassens stripeserie Veslemøy er samla i stort format, med stort hjarte.
Vantina Nina Andreassen starta serien “Veslemøy” side2.no i 2008. Sidan då har den gått i ymse aviser, blader og nettstader. Dette er den første ordentlege trykte samlinga av stripene hennar.
Serien har inga handling i vanleg forstand, men den har ein hovudperson. Veslemøy er ei stille, tenksam ung kvinne som iblant vel må føle at ho er den einaste fornuftige mennesket i verda. Men ho foraktar sine medmenneske, eller verda, ho berre forundrar seg over dei.
Du veit korleis det i Nemi av og til dukkar opp stripar som ikkje har nokon punchline i vanleg forstand, men heller eit slags visdomsord (enten serieskaparen sitt eige, eller eit sitat) eller ein refleksjon? Vel, Veslemøy er ein serie som er bygd på slike striper. Ikkje for det, det kan vere både humor og satire i bodskapane som Vantina leverer, men nettopp bodskapen er alltid det viktigaste. I eit tidleg intervju var ho tydeleg på at dette var noko som Nemi inspirerte henne til.
Før eg går vidare vil eg bare få påpeike at eg vanlegvis er svært tilbakehalden til bruken av omgrepet “politisk korrekt”. Ikkje bare fordi omgrepet konsekvent får ein veldig negativ klang, men også for det etter mi meining er blitt ei språkleg krykke – Eit stempel som ein i praksis kan setje på kva eller kven som helst som ein sjølv meiner er prega av for mykje sjølvgodheit eller peikefingermentalitet.
Men når det gjeld Veslemøy har eg vanskeleg for å kome på noko ord som beskriver serien betre enn nettopp det. Den er politisk korrekt. Den formidlar alle dei korrekte meiningane om miljø, forbruk og sosial utrettferdigheit. Veslemøy argumenterer i tillegg ivrig for borgarløn – Det er den eine kampsaka som er særskilt for nettopp denne serien. Ho er ein gjennomført humanist, ho prøver alltid å vise forståing, å ikkje støyte nokon. Samstundes har ho veldig tydelege meiningar og viser tydeleg forakt for handlingar og holdningar som ho meiner er til skade for samfunnet og for sjølve jordkloden.
Det er lett å finne ting å kritisere Vantina for. Du kan anklage henne for å vere moraliserande, besserwisser, banal, eller ganske enkelt for negativ. Men alt ved serien hennar er gjort med så mykje hjartelag, oppriktigheit, og grunnleggande klokskap at det er vanskeleg å ikkje likevel bli glad i Veslemøy. Og om bodskapane hennar ofte er enkle, er dei på same tid ofte gjennomtenkte og vel formulerte.
Og den siste stripa i samlinga er berre heilt perfekt plassert.
Nokre ord om formatet og den grafiske presentasjonen. Boka er i ekstra stort avlangt format, omtrent som eit tradisjonelt julehefte – bare tjukkare og i hardcover. Det er ikkje særleg praktisk eller komfortabelt og eg spekulerer på kvifor boka vart sjåande slik ut. Eg skal innrømme at det ser lekkert ut, og det tar ser nok ikkje minst bra ut på display i bokhandelen. Kanskje det ligg ei filosofisk avgjerd bak? Stor bok for ein stripeserie som tenker stort? Vantina er ein dyktig teiknar, eg skal ikkje påstå noko anna, og sjølv om stripene hennar kan vere ordrike er det nesten alltid ein god symmertri mellom tekst og teikning. Men teikningane hennar er ikkje særleg detaljerte. Det er inga grunn til at dei skal vere i større format enn andre, norske stripeseriar som vert samla i bokform.
Kanskje det ideelle formatet for Veslemøy hadde vore ein dag-til-dag kalender, ettersom dei fleste stripene står best for seg sjølv, og kvar og ein av dei er til ettertanke.
Veslemøy
Av Vantina Nina Andreassen
ISBN 9788202483999
279 kr.
184 sider
Cappelen Damm
FRA KUBERT TIL KITTELSEN <- Eldre | Nyere -> CORTO MALTESE ER TILBAKE