OCX 2013 - GRAHAM OG DEFORGE (12.06.13 )
To særeigne stemmer i den amerikanske seriefloraen.
Programposten kl 15 var eit tandem-intervju med Brandon Graham og Michael DeForge. Intervjuar var Aksel Kielland.
På overflata synast det kanskje litt merkeleg å setje saman eit panel med ein superheltforfattar, Brandon Graham, og ein slik utprega alternativ serieteiknar som Michael DeForge, men det viser seg raskt at der er mange fellesnemnarar i deira framgangsmåte og arbeidsetikk.
I intervjuet fekk vi ei oversikt over deira karrierar. Grahams start kom som pornoteiknar med seriane «Perverts of the Unknown» og «Pillow Fight» , ifølge han sjølv ei karriere som møtte ein del utfordringar idet han var meir interessert i å utforske karakterane i dialog-scener enn i å lage masturbasjonsmateriale, og til slutt fekk han fyken.
Grahams tilknyting til Meathaus-antologien, ein kjend «alternativ» antologi basert rundt teikneseriestudentar frå New York School of Visual arts, vart og diskutert; eit serie-kollektiv som frambrakte mange kjende serieteiknarar og designarar.
Hans gjennombrot kom seinare med den fritt utforma og surrealistiske sci-fi komedien «King City», inspirert mellom anna av manga og grafitti – Ein serie født ut av hans frustrasjon med å lage seriar for andre. Der gjorde han eit medvete val om å jobbe med å vere original, å redigere vekk ting som synast for enkle, ting han lett vart entusiastisk over. Mottoet hans var «plot is the enemy».
Når Graham starta på «Prophet» for vel eit år sidan, ein superheltserie for Image comics skapt på 90-talet av den kontroversielle teiknaren Rob Liefeld (kontroversiell hovudsakleg fordi hans stil vart eit symbol på ein overdrivent macho 90-talsstil som var svak på manus og teikneteknikk), så var det med eit par unike tilpassingar.
Graham fekk frie hender, og med seg sjølv som manusforfattar sette han opp eit team av fire rullerande teiknarar på serien, samstundes som han laga plass bak i månadshefta til korte gjestespel av andre teiknarar. På det viset kunne han skaffe jobb til fleire gode teiknarar, samstundes som dei unngikk deadline-press på hovudserien, og dei ville ha tid til andre ting. Graham kommenterte at han såg på «Prophet» som ein måte å finansiere seriar som han sjølv utvikla, og det gjorde dei andre òg, slik at denne arbeidsmetoden gjorde at dei fekk tid til å gjere sitt eige. Korthistoriene meinte Graham kunne nyttast til å vise fram nye talent.
f.v. Graham og Deforge
Michael DeForge starta med å snakke om sin antologi «Lose», der første nummer kom ut for 5-6 år sidan. Han er no oppe på nummer 5. Han jobbar ikkje eigentleg med lengre seriar, og når han gjorde det 22 siders førstenummeret av «Lose» så var det den lengste serien han hadde gjort til då. Dette er korte historier som han prøvar å organisere laust kring eit tema. Dette for å skilje dei frå korthistorier som han har gjort for diverse andre antologiar.
DeForge sine seriar er medvetent surrealistiske, for han er poenget å velje eit heilt fjernt konsept og så ta det heilt alvorleg innanfor rammene av dei genrane og ideane han kommenterer. «Lose» nummer 4 nyttar temaet «mote», og innanfor det skriver og teiknar DeForge ei bisarr historie om kanadiske kongelege, eit virus som gir folk eit utslett som ser ut som eit bondagekostyme , og ei historie om ein by der alle, inkludert dyr, går rundt med det same ungjente-andletet grunna ei liding kalla «Stacyface».
Ein av grunnane til at han jobbar med korthistorier er at han merka at han kjeda seg og vart frustrert viss han skreiv for mykje på førehand, så no har han eit laust utkast og skriver kvar side like før han teiknar den opp. Han har og 3 månadlege «striper» som han lagar for diverse magasin.
Graham og DeForge har arbeida saman, på pornografi, av alle ting, idet DeForge er med-redaktør på porno-antologien «Thickness» saman med Ryan Sams. Og igjen kjem ein attende til at dette er «porno» som subverterer genren så mykje at det ikkje eigentleg er masturbasjonsmateriale. Til dømes fortel DeForge om ein historie han gjorde som var ein slags «varulvhistorie» der ein mannleg collegestudent vert forvandla til ei jente kvar fullmåne og reiser til eit anna college for å ha sex med menn.
På slutten fekk DeForge spørsmål om sitt arbeid som produksjons-teiknar på det populære Cartoon Network showet «Adventure Time». Han omtalte seg sjølv som ein som vart sett til å teikne det som måtte gjerast unna rundt omkring, slik som bakgrunns-arbeid og gjenstandar etc. Men han hadde nyleg jobba på storyboards for ein historie saman med Cole Sanchez og opplevde det som ei krevjande men givande utfordring.
Ifølge DeForge er der faktisk store skilnader på Storyboard-arbeid og teikneseriar, mellom anna at der han i sitt eige arbeid kunne bruke ti sider på ei samtale han synast var interessant, så ville ein i ein teiknefilmserie fått beskjed om at «den scena er to minutt. Basta». Så det kravde ei meir rasjonalisert arbeidsmetode.
OCX 2013 - NORGE NÅ <- Eldre | Nyere -> OCX 2013 - SERIEMORD