Ida Larmo og John S. Jamtli har begge nyleg utgitt teikneserieromanar som dreier seg rundt skip frå andre verdskrigen. Onsdag var dei på Bergens Sjøfartsmuseum for å snakke om Tirpitz og Rigel.

Panelsamtalen «Prosalong i Bergen: Krigshistorier i tegning og tekst» var arrangert av Norsk faglitterær forfatter- og oversetterforening (NFFO) i samarbeid med museet, Outland Bergen og Strand Forlag.  I samtale med dei to serieskaparane var litteraturformidlar Kjersti Eide Hatland og historikar og NFFOs regionkontakt, Vigleik Mathiasen.

I fjor kom Ida Larmo med «Rigel – Urettens ekko» om krigsfangeskipet Rigel, som blei senka i 1944, og som framleis er Norgeshistorias største skipskatastrofe, Ho var inspirert av Roy Jacobsens roman «Hvitt Hav», men såg elles at det var ei lite fortald historie, ei som ho ønska å bringe fram i lyset. Ho fortalde den gjennom augo til ein overlevande sovjetisk krigsfange, Julian Oreskjin. Fordi dramaet er så lite kjent, var det også vanskeleg å finne referansar. Ho bestilte mellom anna ein modell av Rigel som viste seg å vere for liten til å teikne etter. Som eit apropos til arrangementsstaden så blei Rigel bygd i Bergen

John S. Jamtli hadde ikkje dei same problema med å finne referanse for sin teikneserie, «Sabotør: I skyggen av Tirpitz», den tredje av hittil fire bind i «Sabotør»-serien. Senkinga av Tirpitz, også den i 1944, er velkjent for dei historieinteresserte. Det finst eit Tirpitz-museum i Alta og eit forsvarsmuseum i Tromsø med Tirpitz-utstilling.

På den andre sida, som han påpeikte i kveldens arrangement, er han teknisk dyktig nok til å bli møtt med veldig strenge detaljkrav, som når han får kritikk for å teikne feil type knappar på uniformene. Men Sabotør-bøkene er ikkje meint å formidle historia til dei som veit alt, seier han. Viss du pirkar på så mykje, er ikkje boka for deg.

Begge serieskaparar kunne også melde at dei held fram i delvis dei same spora som før. Jamtli ville gjerne trekke fram ein kvinneleg motstandshelt i neste «Sabotør»-bok. Valget falt på Astrid Lineruds eventyr som ein 8 år gammel grenselos. Ida på si side lagar ein ny sjølvbiografisk teikneserie, denne gongen om sine tidlege ungdomsår. Ho lovar at denne blir langt meir utleverande enn den førre, «Bow & Arrow».

Deretter skal ho fokusere på fjernare norsk historie enn Rigel, med ein biografi om ein skarprettar.

Etter å ha snakka med John S. Jamtli er det gjort nokre rettingar 8.10 klokka 17.00.

Forsidebilde: F.v. Vigleik Mathiasen og Kjersti Eide Hatland med Ida Larmo og John S. Jamtli. Fotografi av Trond Sätre