Åtte «Nordisk manga»-titlar er nå seld til forleggarar i USA. Alle saman enten til store forlag innan sitt felt, eller til store forlag, punktum.

På NRK P2 i ettermiddag kunne Tonje Tornes frå TNT/Bonnier røpe at forlaget har fordobla si amerikanske portefølje. Frå før av er «Snøkattprinsen» seld til Oni Press i 2022, «Oppfinneren» til Papercutz/Mad Cave i 2024, «Nordlys» til Inklore/Penguin i 2025 , og tidlegare i år blei det slått stort opp då «Drageviking» blei seld til giganten Penguin Random House.

Nå har forlagsduoen Tonje Tornes og Tormod Løkling seld ytterlegare fire titlar til store forlag i USA. «Ville poter» og «Dragens øye» kjem ut på Tokyopop. «Mia Myhr» blir ugjeve av Scholastic under tittelen «Raven’s Nest» (etter Ravnereir, der det meste av handlinga føregår). Og «Supernova» kjem ut på Harper Collins/Harper Alley.

Tokyopop er kjent for Disney-lisensar og manga-omsetjingar. TNT håper at dette kan opne for sal til Japan. Scholastic har ei rekke med populære teikneseriar som i mange tilfelle også er kjente i Norge: «Hundemannen», «Barnevaktklubben», «Barske Bøller» og – jada! – «Amuletten». Harper Collins er forlaget til m.a. «Nimona», «Lightfall» og «Hooky».

-Vi i Norge har jo lest utruleg mykje teikneseriar frå USA, og nå eksportererr vi til dei. Og nå som vi er oppe i åtte begynner det å likne på ein trend, seier Tonje Tornes til P2s Studio 2, før ho legger til at begrepet «nordisk manga» blei valt nettopp for å vekke utanlandsk interesse.

Til stede i studio var også «Mia Myhr»-skapar Sara Hjardar, som seier at dette er ein draum som har gått i oppfylling, men at det også er skummelt og litt sårbart. Nå skal plutseleg heile verda få dømme serien og lese om desse karakterane. Men eg håper at barn ute i verda kan få leseglede ut av det eg skapar, seier ho.

Innkjøpsordninga i Norge er ikkje fullfinansiert, forklarer så Tonje pragmatisk til Studio 2, det er litt som å spele lotto når du ikkje veit om bøkene blir kjøpt inn til biblioteka. Å vere serieskapar er ein stor risiko økonomisk. Og då kjem desse utanlandske kontraktane som ein ekstra tryggleik. .