Den første norske Sophie Castille-prisen for beste omsetjing av ein teikneserie går til Erlend Loe for Jeppe Sandholts «Ørn».

Festivalen Bergen Tekst & Tegning (BTT) er vertskap for “Sophie Castille Awards For Comics Translation”, ein pris dedikert til omsetjarar av teikneseriar. Prisen blei oppretta til ære for Sophie Castille (1970-2022), som var medgründer og direktør for Europe Comics. Sophie Castille var en nøkkelfigur innan fremjing av teikneseriar og omsetjingar av grafiske romanar over heile verda.

Årets jury har bestått av redaktør for Serienett, Trond Sätre, bibliotekar Anne Elisabeth Kaldhol, teikneseriehistorikar og leiar for Norsk kulturråds vurderingsutval for teikneseriar. Kristian Hellesund, tidlegare leiar for Raptus teikneseriefestival, Arild Wærness, og tidlegare Nemi-redaktør og tidlegare dagleg leiar for Outland, Tina Søreng-Christensen.

Finlistane var:

Lebensborn – Av: Isabelle Maroger. Oversatt av Thomas Lundbo

Lucky Luke nr. 85 – Av: Achdé og Jul. Oversatt av Alexander Leborg

Sagaen om Thorgal nr. 23: Tusen øyne –Av: Yann, Fred Vignaux og Gaétan Georges. Oversatt av Olivia Tångring

Silhuett av en stemme nr. 7 – Av: Yoshitoki Oima. Oversatt av Ellen Haugan

Sprint: Skatten i San Inferno – Av: Lewis Trondheim og Fabrice Tarrin. Oversatt av Arvid Skancke-Knutsen

Ørn – Av: Jeppe Sandholt. Oversatt av Erlend Loe

Den norske Sophie Castille-prisen går til det juryen meiner er den best omsette teikneserie siste året, og blir delt ut under BTT. Årets vinnar, som blei kunngjort på Litteraturhuset i Bergen den 7. november klokka 18.00, er Erlend Loe for omsetjinga av teikneserieromanen «Ørn».

I juryens grunngjeving heiter det:

Ikkje alle prestasjonar innan omsetjing kan målast etter særskilt tung eller sofistikert ordbruk i originalteksten. Heller ikkje alltid etter kor framandarta originalspråket er i norske auge. Nokre gonger skal det flid til for å omsetje dei små nyansane i eit enkelt og munnleg språk, og sørge for at det held på si naturlege flyt. Også når forteljinga kjem frå eit av være næraste naboland.

Den første vinnaren av den norske Sophie Castille-prisen er eit godt døme på det.

Vinnarboka har eit lettfatteleg og leikent språk. Den er sprelsk, og nesten litt tilbakehalden på same tid. Historia blir vakkert og vart fortalt gjennom den norske omsetjinga  Språkføringa framstår som nøye gjennomtenkt i ein teikneserie som tross alt har relativt lite tekst. Omsetjinga evnar også å bevare den danske anden i det norske språket, noko som er ein kunst i seg sjølv å meistre.

Det er ei glede for juryen å utrope Erlend Loe til den første vinnaren av Sophie Castille-prisen for hans omsetjing av Jeppe Sandholts bok «Ørn» frå dansk.

Til stades var Jeppe Sandholt, hans norske redaktør Hans Ivar Stordal frå Strand, og prisens internasjonale koordinator Ivanka Hahnenberger 

Erlend Loe kunne diverre ikkje vere til stades i samband med pristdelinga, fordi skulle han oververe premieren på «Affekt», Anne Marit Jacobsens forestilling på Nationaltheatret, som han hadde vore med på å skrive. Men han sendte følgande melding:  

Det var en glede å oversette Ørn. Jeg er takknemlig for at Strand forlag ba meg om å gjøre det. Jeppe Sandholt har tegnet og skrevet et imponerende stykke tegneseriekunst, og jeg er glad for å kunne være delaktig i at boken hans finner et norsk publikum.

Jeg vil også takke for juryens fine ord, og for at de anerkjenner at det ikke er så enkelt som det kan virke å oversette fra dansk, eller altså fra kolonispråket, som mine nynorskvenner kaller det.

Men jeg har gått på filmskole i Danmark og i noen år til og med forsøkt å skrive filmmanus på dansk, noe jeg er fornøyd med at jeg ikke behøver å gjøre lenger.

Tusen takk og ha en god kveld alle sammen.

Forsidebilde: Hans Ivar Stordal og Jeppe Sandholt. Fotografi av Øystein Nordvik.

Les også:
Til ære for de usynlige arbeiderne