Gjennom konseptet «Årets Donald-lærer» kan skuleelevar over heile landet nominere ein lærar som motiverer og gjer lesing gøy.

Nyaste utgåva av Donald Duck & Co. kunngjer arrangørane denne konkurransen. I nominasjonsteksten heiter det:

«Kjenner du en lærer som gjør lesing gøy?
En Donald-lærer er en lærer som:
Bryr seg litt ekstra, bruker fantasi og humor i undervisningen og inspirerer hele klassen til å elske og lese
Nå vil vi løfte fram disse lærerne!»

Barn over heile landet blir inviterte til å nominere ein lærar som dei synest passar desse kriteria. Vinnaren får 10 000 kroner øyremerka «leseglede» – dvs. bøker og anna som kan vere med på å bidra til med leselyst i klasserommet – pluss eit klassesett med Donald-blader. Dessutan blir læraren duckifisert, altså teikna som en Donald-karakter.

I ein «finalerunde» skal det stå att fire nominerte som blir offentleggjorde, og blant desse fire skal det kårast ein vinnar i august.

Juryen består av tidlegare kulturminister og nåverande direktør i Forleggarforeininga, Trine Skei Grande og Donald-redaktør Marius Molaug (f.v. på bildet ovanfor; fotografi tilhøyrer arrangørane).

– Leseglede kjem ikkje av seg sjølv. Ofte treng barna ein dult i rett retning og rett lesestoff i hendene. For mange kan eit Donaldblad vere løysinga! Det er noko med kombinasjonen av sterke figurar og fantasifulle historiar i teikneserieformat som gjer at stadig nye barn ser leselyset i møte med Donald! Gjennom «Årets Donald lærer»-initiativet ønsker vi å belønne dei gode andbassadørane som fremjar lesegleda i klasserommet, seier Molaug.

«Årets Donald-lærer» blei første gongen utlyst i 2024, og det er Kulturmeglerne som promoterer prosjektet.

I 2024 la regjeringa fram ein strategi for nasjonal leselyst med mål om å få fleire til å lese meir. Strategien vart framlagd i etterdønningane av nedslåande rapportar om leseferdigheitene og leselysta til barn og unge. Strategien som skal vare fram til 2030 inkluderer fleire tiltak, mellom anna ei styrking av leseopplæring i skulen døypt «Tid for lesing». «Årets Donald-lærar» feirar dei som er med å påverke unges lesevanar i størst grad; lærarane.

– I vaksen alder er det dei motiverte og engasjerte lærarane vi hugsar best tilbake på. Eg er glad for å få bidra til å kasta litt ekstra glans over lærarar som inspirerer til uunnverleg leseglede og skaper leselyst som blir med elevane ut av klasserommet og vidare resten av livet, seier Grande.